აჭარის სოფლის მეურნეობისა და გარემოს დაცვის მინისტრმა, დენის სალუქვაძემ, შუახევის მუნიციპალიტეტის საკრებულოს თავმჯდომარესთან იაგო დავითაძესთან ერთად, მუნიციპალიტეტში სამინისტროს პროგრამის „საოჯახო მეურნეობების განვითარების ხელშეწყობის“ ფარგლებში დაფინანსებული ვაზისა და კაკლის ბაღები დაათვალიერა, ასევე მოინახულა საფუტკრე მეურნეობა და ადგილზე გაეცნო არსებულ მდგომარეობას.
ხელმძღვანელმა პირებმა ფერმერებთან შეხვედრა გამართეს და სოფლის მეურნეობის განვითარების მნიშვნელობაზე, სახელმწიფო მხარდაჭერის მექანიზმებზე, ფერმერთა გაძლიერების აუცილებლობასა და დარგის განვითარების ძირითად მიმართულებებზე ისაუბრეს.
„აჭარის რეგიონი თავისი უნიკალური კლიმატური პირობებითა და ბუნებრივი რესურსებით მნიშვნელოვან პოტენციალს ფლობს მეხილეობის, მევენახეობისა და მეფუტკრეობის განვითარების მიმართულებით. ამ პოტენციალის სრულად ათვისებისთვის აუცილებელია თანამედროვე ტექნოლოგიების დანერგვა, ცოდნის გაღრმავება და ფინანსურ რესურსებზე ხელმისაწვდომობის გაზრდა“, – განაცხადა დენის სალუქვაძემ.
შეხვედრის მიზანი იყო პროგრამის ფარგლებში დაფინანსებული პროექტების შედეგების ადგილზე გაცნობა, ფერმერებთან უშუალო კომუნიკაცია, მათი საჭიროებებისა და გამოწვევების მოსმენა, ასევე სოფლის მეურნეობის განვითარების ხელშეწყობის მიზნით არსებული და სამომავლოდ დაგეგმილი სახელმწიფო მხარდაჭერის ღონისძიებების განხილვა.
მინისტრთან ერთად ასევე იმყოფებოდნენ მინისტრის მოადგილეები გიორგი ფანცხავა, არჩილ ბერიძე, შუახევის მუნიციპალიტეტის მერი ომარ ტაკიძე, საკრებულოს თავმჯდომარის მოადგილე თენგიზ ივანაძე და აგრარული განვითარების დეპარტამენტის თანამშრომლები
